Ministrja e Arsimit, Arbërie Nagavci, të mërkurën ka njoftuar se janë nënshkruar kontratat për ndërtimin e pesë çerdheve të reja.
Komunat të cilat pritet të përfitojnë nga këto kontrata janë Prishtina, Gjilani, Gjakova dhe Kamenica.
Ndërtimi i objekteve pritet të fillojë javën e ardhshme.
“E lumtur që në kuadër të përmbushjes së zotimit tonë, sot nënshkruam kontratat për ndërtimin e 5 çerdheve të reja. Këto objekte do të ndërtohen në Prishtinë, Gjilan, Gjakovë, Kamenicë dhe Doberçan të Gjilanit. Ndërtimi i këtyre objekteve pritet të fillojë javën e ardhshme”, thuhet në njoftimin e ministres Nagavci.
Nagavci ka bërë të ditur se, Ministria që ajo e drejton është në kontakt edhe me komuna të tjera për ndërtimin e çerdheve të reja.
Ndërkaq, siç ka treguar ajo, një objekt i shkollës në Junik, është duke u renovuar për t’u shndërruar në çerdhe.
Po ashtu, Nagavci ka thënë se “edhe 4 objekte të tjera si në Banjë të Malishevës, në Korenicë të Gjakovës, në Muzeqinë të Shtimes si dhe në Babush të Ferizajt janë në procedurë të tenderimit për t’u shndërruar në çerdhe”.