Dyshimet mbi një ndërhyrje të mundshme në faqen zyrtare të KQZ-së në ditën e zgjedhje nacionale kanë bërë që Prokuroria Themelore në Prishtinë të kërkojë përgjigje.
E kjo e fundit, një autorizim për hetime ia ka dhënë Policisë së Kosovës që të hetojnë për secilin abuzim apo keqpërdorim të votave pas rënies së faqes së KQZ-së.
“Lidhur me pyetjen tuaj ju informojmë, se Prokuroria Themelore në Prishtinë ka autorizuar që Policia e Kosovës në bashkëpunim dhe në koordinim me institucionet kompetente të ndërmarrin veprime apo masa hetimore për secilin abuzim apo keqpërdorim të votave pas rënies së ëeb faqes së KQZ-së”.
Ndërkohë, kompania që përmes OSBE-së ishte kontraktuar që ta zhvillojë sistemin e menaxhimit të votimit, Cacttus ka thënë se janë duke bërë analizë por kanë konfirmuar se faqja e internetit të KQZ-së, së bashku me infrastrukturën tjetër qeveritare, ka qenë shënjestër e sulmeve kibernetike të vazhdueshme, si gjatë ditës së zgjedhjeve. Aplikacioni, sipas tyre, është hostuar në infrastrukturën e Agjencionit të Shoqërisë së Informacionit të Kosovës.
“Ne po bashkëpunojmë në mënyrë aktive me Komisionin Zgjedhor të Kosovës, organet e drejtësisë dhe agjencitë qeveritare përkatëse për të zbutur këto sulme dhe për të mbrojtur integritetin e sistemit”, thuhet në reagimin e kompanisë.
Për njohës të çështjeve juridike, institucioneve u mbetet që t’i dorëzojnë të dhënat tek organet e drejtësisë.
“Konsideroj që kjo është mësim për KQZnë për menaxhimin e uebfaqes. Kompanitë përgjegjëse do duhej t’iu binte barra sepse ata kanë dështuar duke mos e menaxhuar në mënyrë të duhur ngase ky veprim ka ndodhur përmes rrjeti. Sulmet kibernetike janë larg për ne, s’jemi të avancuar t’i përballim. Kompania përgjegjëse duhet t’iu ofrojë organeve metodën e menaxhimit të rrjetit. Në këtë situatë kemi të bëjmë me sulm kibernetik dhe gjithçka mund të jetë e mundur. Pasojat kanë ndodhur. S’është hera e parë që kemi të bëjmë me sulme kibernetike dhe u mbetet institucioneve të investojnë në mbrojtjen e tyre”, ka thënë avoktari Anton Nrecaj.
Edhe inxhinier të kibernetikës janë shprehur të shqetësuar me këto sulme në faqen e KQZ-së duke ngritur dyshime se të tilla raste kanë ndodhur vazhdimisht.