Presidentja e Kosovës, Vjosa Osmani, është deklaruar një ditë pasi e ka pritur në takim udhëheqësin e Agjencisë Qendrore të Inteligjencës Amerikane, CIA, William Burns.
E para e vendit ka thënë se aleanca me Shtetet e Bashkuara të Amerikës (ShBA) është garancë për siguri, paqe e sukses, teksa ka shpërndarë disa fotografi nga takimi.
“Aleanca me Shtetet e Bashkuara, garancë për siguri, paqe e sukses! Kënaqësi që mirëprita dje në Republikën e Kosovës Shefin e Agjencisë Qendrore amerikane të Inteligjencës (CIA), ambasadorin William Burns”, ka shkruar Osmani në Facebook.
Dje, shefi i CIA-s takoi presidenten Osmani dhe shefin e Agjencisë së Kosovës për Inteligjencë (AKI), Petrit Ajeti, ndërsa sot është parë duke hyrë në ndërtesën e Qeverisë së Kosovës për takim me kryeministrin e Kosovës, Albin Kurti.
Vizita e shefit të CIA-s në Kosovë pason vizitat që zyrtari kryesor i inteligjencës amerikane zhvilloi në Bosnje e Hercegovinë dhe Serbi.