Ministri i Punëve të Brendshme , Xhelal Svecla ka bërë të ditur se është mbyllur edhe pika kufitare në Merdarë.
Sipas tij kjo është bërë për shkak të veprimeve “të ekstremistëve të maskuar serbë brenda territorit të Serbisë”.
“Pas veprimeve të njejta të ekstremistëve të maskuar serb brenda territorit të Serbisë, që po ndalojnë në mënyrë selektive e me qasje fashiste ndaj qytetarëve që duan të kalojnë tranzit përmes Serbisë dhe gjithë kjo para syve të autoriteteve të Serbisë, mbyllet edhe pika kufitare në Merdarë”, tha ai.
Sveçla u shpreh se ky veprim u bë për mbrojtjen e jetës së qytetarëve të Kosovës.
“Në mbrojtje të jetës dhe për sigurinë e të gjithë qytetarëve tanë, edhe kjo pikë si ajo në Bërnjak do të jetë e mbyllur deri në ndalim të veprimeve të tilla selektive e fashiste e normalizim të plotë të situatës”, tha ai.
Po ashtu, Ministri Sveçla, më herët ka njoftuar për mbylljen e pikëkalimit kufitar me Serbinë në Bërnjak. Ky vendim është marrë pas raportimeve se persona të maskuar në Serbi kanë ndaluar automjetet dhe kanë kontrolluar udhëtarët.