Shtetet e Bashkuara të Amerikës (SHBA) i kanë kërkuar Moskës të pranojë një marrëveshje për lirimin e basketbollistes Brittney Griner, e cila është dënuar me nëntë vjet burg në Rusi.
Fituesja e dy medaljeve olimpike u dënua për posedim dhe kontrabandë droge pasi në çantën e shpinës i ishte gjetur vaj kanabisi.
Zëdhënësi i Sigurisë Kombëtare të Shtëpisë së Bardhë, John Kirby tha se oferta e SHBA ishte “një propozim serioz”, por nuk dha detaje të mëtejshme.
Të premten, ministri i jashtëm rus, Sergei Lavrov tha se Moska është e gatshme të diskutojë këtë temë.
Raportet e mediave amerikane sygjerojnë se Uashingtoni po ofron një shkëmbim të burgosurish që përfshin një trafikant rus armësh.
Viktor Bout, i njohur si “tregtari i vdekjes”, po vuan një dënim me 25 vjet burg në SHBA.
Ai mund të transferohet nga Uashingtoni te autoritetet ruse në këmbim të Griner dhe ish-marinsit amerikan Paul Whelan, thonë raportet, transmeton BBC.
Whelan, i cili ka pasaporta amerikane, britanike, kanadeze dhe irlandeze, u dënua në vitin 2020 me 16 vjet burg në Rusi pasi u dënua për spiunazh.
Kirby u tha gazetarëve se dyshja po ndalohej gabimisht dhe duhej të lirohej.
Asnjë marrëveshje me SHBA-në, për shkëmbimin e Griner dhe të tregtarit të armëve Bout, thotë Rusia
Rasti “Griner’ hedh në qendër të vëmendjes diplomacinë e pengjeve.
Lidhur me propozimin e SHBA-së, Kirby tha: “Ne i nxisim ata ta pranojnë atë. Ata duhet ta kishin pranuar atë javë më parë kur ne e bëmë për herë të parë.”
Por sipas agjencisë së lajmeve Reuters, një pengesë është se Rusia dëshiron të shtojë në shkëmbim të propozuar edhe vrasësin e dënuar Vadim Krasikov, i cili ndodhet në burg në Gjermani.
Griner, 31 vjeç, i tha gjykatës se kishte bërë një “gabim të ndershëm” dhe nuk kishte ndërmend të shkelte ligjin.
E konsideruar si një nga sportistet më të mira në botë, ajo u ndalua në shkurt në një aeroport afër Moskës, kur në bagazhin e saj u gjetën fishekë që përmbanin vaj kanabisi.
Ajo kishte ardhur në Rusi për të luajtur basketboll klubesh gjatë sezonit.
Menjëherë pas kësaj, Rusia pushtoi Ukrainën dhe rasti i saj është bërë objekt i diplomacisë së profilit të lartë midis SHBA-së dhe Rusisë.
Shokët e skuadrës së Griner Phoenix Mercury organizuan një gjest solidariteti të enjten, kur ata dhe kundërshtarët e tyre të Connecticut Sun mbajtën 42 sekonda heshtje para ndeshjes së tyre, për nder të fanellës së saj me numrin 42.
Blinken e ngriti çështjen në një telefonatë me Lavrov javën e kaluar, në bisedën e parë mes dy burrave që nga fillimi i luftës në Ukrainë.
Një ditë pas dënimit të Griner, Lavrov tha se Moska është e gatshme të diskutojë temën e shkëmbimit të të burgosurve me Uashingtonin, por brenda kuadrit të një kanali ekzistues diplomatik të rënë dakord nga presidentët Putin dhe Biden, e citon atë të ketë thënë agjencia e lajmeve, Reuters.
Lavrov dhe Blinken janë tani në Kamboxhia për një takim të Shoqatës së Kombeve të Azisë Juglindore.