Organizata e Veteranëve të Luftës së UÇK-së ka paralajmëruar protestë të hënën, më 5 tetor, para Kuvendit të Kosovës, pas dështimit për të arritur një marrëveshje politike dhe procedurale për votimin e menjëhershëm të plotësimit dhe ndryshimit të Ligjit për Gjykatën Speciale.
Sipas njoftimit të OVL-UÇK-së, protesta do të nisë në ora 12:00, ndërsa organizata u ka bërë thirrje të gjithë qytetarëve që t’i bashkohen tubimit.
Veteranët kanë shprehur pakënaqësi ndaj qasjes së kryeministrit në detyrë, Albin Kurti, duke e akuzuar atë për zvarritje dhe kalkulime politike lidhur me këtë çështje.
OVL-UÇK ka deklaruar se kategoritë e dala nga lufta janë të indinjuara me mënyrën se si po trajtohet çështja dhe ka kërkuar që të mundësohet votimi i menjëhershëm i të dy leximeve të ndryshimeve ligjore.
Organizata ka vendosur si afat të fundit të dielën, më 4 tetor, për arritjen e një marrëveshjeje politike dhe procedurale. Në rast se nuk arrihet dakordim, veteranët paralajmërojnë përshkallëzim të veprimeve nga dita e hënë.
“Veteranëve dhe qytetarëve të Kosovës u është shterur durimi”, thuhet në njoftimin e OVL-UÇK-së, e cila i ka ftuar qytetarët të mblidhen të hënën në ora 12:00 para Kuvendit të Kosovës.