“Nuk po fsheh asgjë, mendova se demarkacioni [me Republikën e Kosovës] ishte zgjidhja, e kuptova se ishte e pamundur, sepse të gjithë m’u hodhët mbi kokë”, ka deklaruar Presidenti i Serbisë, Aleksandar Vuçuq.
Por tani Vuçiq nuk e ka më të njëjtin mendim, sepse rrethanat kanë ndryshuar.
Duke iu përgjigjur pyetjes për zgjidhjen e tij në Kuvendin e Serbisë, ai tha se sot po e shikon qëndrimin në mënyrë realiste, sepse situata politike ka ndryshuar në 28 vitet e fundit, “jo vetëm me vullnetin tonë, por edhe me vullnetin e fuqive të mëdha”.
“Pozicioni nuk mund të jetë i njëjtë para dhe pas vitit 1999, as pas 2008, as 2010, e gjithë kjo mbart diçka me vete”, ka thënë Vuçiq, duke shtuar se disa lëvizje e vështirësuan pozitën.
Ideja e demarkacionit më Serbinë ishte përkrahur nga ish-presidentit i Kosovës, Hashim Thaçi, mirëpo kjo ide në Kosovë asokohe nuk kishte gjetur mbështetje, madje ishte quajtur si tradhti kombëtare nga opozita e atëhershme.
Tani përballë kërkesës për themelimin e Asociacionit të Komunave me shumicë Serbe në Kosovë, ideja e shkëmbimit po përmendet nga njohës politikë dhe analistë të sigurisë si opsion më i mirë, raporton N1.