Kuvendi i Kosovës e ka nisur seancën plenare me një minutë heshtje në përkujtim të viktimave të masakrës së Srebrenicës, e cila konsiderohet si një nga masakrat më të mëdha në Evropë.
Përvjetori i kësaj masakre, e cila u krye nga forcat serbe, është nesër më 11 korrik.
“Nesër është 28-vjetori i masakrës së Srebrenicës, është masakra më e madhe pas luftës së dytë botërore në kontinentin evropian. Më 11 korrik 1995, forcat kriminale serbe vranë mbi 8 mijë e 743 boshnjakë në Srebrenicë, për këtë arsye propozoj ta përkujtojmë këtë ditë”, tha Konjufca.
Gjenocidi i Srebrenicës ose Tragjedia e Bosnjës është një krim lufte i zbatuar në korrik të vitit 1995 në Bosnje dhe Hercegovinë, ku u vranë më shumë se 8,000[6] boshnjakë myslimanë, kryesisht burra dhe djem të moshës 12 deri 77 vjet.
Gjenocidi është zbatuar në rajonin e Srebrenicës nga Ushtria e Republikës Serbe (VRS) nën udhëheqjen e gjeneralit Ratko Mlladiq, duke përfshirë njësinë paraushtarake “Škorpioni”, e cila ishte pjesë e Ministrisë së punëve të Brendshme të Serbisë, si dhe disa qindra vullnetarë grekë dhe rusë.
Gjykata Ndërkombëtare e Hagës ka marrë vendimin që masakra e Srebrenicës të njihet si gjenocid.