Qeveria gjermane ka vendosur të zgjasë mandatin e disa misioneve ushtarake jashtë vendit, përfshirë edhe pjesëmarrjen në misionin paqeruajtës të NATO-s në Kosovë, KFOR.
Për të hyrë në fuqi, vendimi duhet të miratohet nga Bundestagu – Parlamenti i Gjermanisë.
Zëdhënësi i qeverisë gjermane, Stefan Kornelius, tha se ky vendim tregon përkushtimin e vazhdueshëm të Berlinit për paqe dhe stabilitet në rajonin e Ballkanit, ka raportuar gazeta gjermane Zeit.
Forcat gjermane të Bundeswehr-it janë të pranishme në Kosovë që nga viti 1999, kur u vendosën si pjesë e misionit KFOR të udhëhequr nga NATO.
Aktualisht, në Kosovë janë të stacionuar rreth 400 ushtarë gjermanë.
“Situata e sigurisë në vend mbetet e brishtë”, deklaroi Kornelius.
Në vitin 2023, kontingjenti gjerman u shtua përkohësisht për shkak të rritjes së tensioneve në veri të vendit.
“Një Kosovë e qëndrueshme është me rëndësi thelbësore për Gjermaninë dhe të gjithë Evropën”, tha Kornelius.
Zeit raporton se, ndërsa misioni i KFOR-it është teknikisht i pafund, mandati i tij i paraqitet ende Bundestagut për miratim vjetor.