Spitali i Përgjithshëm “Isa Grezda” në Gjakovë ka reaguar ndaj raportimeve në disa portale, duke i cilësuar lajmet për mosfunksionimin e aparatit të skanerit CT si të pavërteta.
Në një postim në Facebook, institucioni ka sqaruar se aparati është plotësisht funksional dhe të gjitha rastet po trajtohen normalisht.
“CT-ja është plotësisht funksionale dhe të gjitha rastet po punohen normalisht. Dje pajisja ka qenë vetëm në mirëmbajtje të rregullt teknike, siç ndodh çdo muaj ose sa herë që është e nevojshme”, thuhet në njoftim.
Spitali ka shtuar se në rast të ndonjë defekti, ekziston një kompani kontraktuale që kujdeset menjëherë për servisimin e pajisjeve, duke garantuar vijimësi të shërbimeve.
“Nuk ka asnjë arsye për shqetësim — qytetarët e Gjakovës po marrin shërbimet diagnostike pa asnjë ndërprerje. Mos u bëni pre e dezinformatave dhe portaleve me qëllime të këqija”, përfundon reagimi i Spitalit të Gjakovës.