Deputeti i Partisë Demokratike të Kosovës (PDK), Hajdar Beqa, në seancën e së enjtes ka akuzuar ministren e Punëve të Jashtme, Donika Gërvalla, se nuk ka sjellë ndonjë sukses në diplomacinë kosovare, por se vetëm i ka bërë “argaten e Serbisë kundër Ushtrisë Çlirimtare të Kosovës (UÇK)”.
Sipas Beqës, këtë ia ka thënë vetë Gërvallës ministri i Punëve të Jashtme i Serbisë, Ivica Daçiq, i cili e ka falënderuar e lëvduar “për të keq që ia ka bërë argaten Serbisë”.
“Edhe ata që e kanë lëvduar e falënderuar e kanë lëvduar për keq, që është bërë argate e Serbisë kundër UÇK-së. E dimë cfarë i ka thënë Daçiqi, pse ka thënë që ka me dërgu dosje e me bashkëpunu, nuk dua të thellohem më shumë. Ligji për hetim parlamentar është instrument në vete, ne duhet ta hetojmë, nuk duhet të frikësohet nga zbardhja e së vërtetës, ta dimë si përfaqësojnë njerëzit që marrin para publike”, ka thënë Beqa.
Sipas Beqës, rezultatet maten me vepra konkrete e punë, dhe se, sipas tij, kjo ministre nuk ka sjellë asnjë njohje e asnjë anëtarësim në organizata ndërkombëtare.
“Besoj të gjithë jeni të pajtimit, rezultatet maten me vepra konkrete e punë. Asnjë sukses kjo ministre nuk e ka pasur, asnjë njohje, asnjë anëtarësim në organizata ndërkombëtare”, ka vijuar ai.
Ai ka akuzuar Gërvallën se i ka blerë jashtëligjshëm gjashtë vetura në Zagreb ambasadorit Martin Berishaj.
“Ne kemi aq shumë skandale në diplomaci. Skandali i fundit ku ministrja e Punëve të Jashtme, Donika Gërvalla, i ka blerë jashtëligjshëm gjashtë vetura në Zagreb ambasadorit Martin Berishaj. Me ligj të prokurimit publik nuk lejohet udhëheqja e kontratave njëburimore jashtë shtetit”, ka vijuar ai.