Analisti politik, Dardan Gashi, vlerëson se prania e mbrëmshme e Njësisë Speciale të Policisë së Kosovës në Skenderaj pas sulmit ndaj Hysni Mehanit ku dyshohet se i përfshirë është edhe Sami Lushtaku është e paarsyeshme.
Gashi, i ftuar në “Debat Plus” në Dukagjin, thotë se prania e një numri të madh të Njësisë Speciale ishte shqetësues për qytetarët.
Mes tjerash, Gashi krahasoi edhe rastin me mosparaqitjen e kryeministrit në detyrë, Albin Kurti, në Prokurori, duke thënë se nëse standardi i reagimit është i njëjtë, atëherë institucionet do të duhej të kishin vepruar njësoj edhe në atë rast.
“Sami Lushtaku po thotë se nuk është ai që e ka sulmuar Hysni Mehanin, por kanë qenë njerëz të tjerë aty që e kanë sulmuar në irritim të atij statusi që e quante “Sami Serbia”. Burracakëri është sulmet me dekada, t’kishte qenë hera e parë do të kuptohej satira por duke qenë që është hera e disatë është vështirë me lexu nën rreshta se çfarë ka dashtë të thotë. Më e padrejtë dhe më burracakëri është Kurti e Svecla me dërgu Njësinë Speciale anti-terror e me shqetësu njerëz në Skenderaj. Nëse kjo njësi qenka për raste të tilla, do të duhej të shkonte të merrte kryeministrin kur nuk i është përgjigjur Prokurorisë – i njëjti rast është. Nëse Albin Kurti nuk i është përgjigje Prokurorisë do ishte dashur që Njësia Speciale me shku me ia rrethu shtëpinë. Nuk e dimë në çfarë cilësie është ftu për intervistim Lushtaku”, thotë Gashi.