Drejtori komunal i Arsimit në Podujevë, Avni Fetahu, të shtunën ka bërë të ditur se anulimi i ceremonisë për vendosjen e gurthemelit të Shkollës së Mesme Ekonomike “Isa Boletini” në Podujevë, ka ardhur pas vendimit të Gjykatës Komerciale që ia ndalon punimet operatorit fitues të tenderit.
Fetahu ka thënë se vendimin e kanë marrë dje pas përfundimit të orarit të punës.
“Më datën 30 (maj), Gjykata Komerciale ka marr një vendim të cilin nuk e ka përcjellë tek ne deri ditën e djeshme pas orarit të punës dhe atë nga operatori ekonomik, ku e pezullon aktivitetet e kompanisë që ka fituar tenderin dhe përkohësisht janë ndal punimet”, ka thënë Fetahu, raporton EO.
Në ceremoninë e planifikuar për në orën 11:00 ishte paralajmëruar se do të merrnin pjesë kryeministri Albin Kurti, ministrja e Arsimit, Arbërie Nagavci dhe kryetari i Podujevës, Shpejtim Bulliqi.
Gazeta Insajderi raportoi të premten se fitues i tenderit ishte një person i afërm me kryetarin e Podujevës, Shpejtim Bulliqi.