Kryetari i Kuvendit të Kosovës, Glauk Konjufca, ka përkujtuar Ilaz Kodrën në 25-vjetorin e rënies heroike për çlirimin e Kosovës.
“Heroi Ilaz Kodra është një ndër figurat më emblematike të UÇK-së, i rritur e formësuar në frymën kombëtare e patriotike, Ilaz Kodra nuk kishte asnjë iluzion që Kosova mund të çlirohej nga Serbia pa luftë pikërisht për këtë arsye u bashkuar me Adem Jasharin Hamëz Jasharin, Zahir Pajazitin e të tjerë në njësitin e parë ushtarak,” tha Konjufca.
Konjufca foli edhe për kontributin e të rënëve për liri.
“Ky grup patriotësh që i përkasin kronikës më të lavdishme të historisë sonë e panë të parët lirinë e Kosovës, prandaj sakrifikuan çdo gjë që këtë liri ta gëzojë i gjithë populli ynë, kontributi i komandantit Ilaz Kodra për organizimin dhe strukturimin e luftës çlirimtare është i hershëm sikurse pjesëmarrja e tij në luftë e aksione të pandalshme deri kur ra në altarin e lirisë më 30 prill të 1999 në mbrojtje të popullatës civile që po sulmohej në të gjitha anët në fshatrat e Drenicës,”
Pothuajse nuk kishte betejë në Drenicë e rrethinë ku Ilaz Kodra nuk kishte marrë pjesë, kujtoi Konjufca.
Konjufca po ashtu përmendi se Ushtria Çlirimtare e Kosovës është kapitulli më i ndritur i historisë sonë të shekullit 20-të, e Drenica me luftëtarët e saj i dha historisë heronj ku jeta dhe vepra e tyre është frymëzim për ne dhe brezat që do t’i lëmë pas.
Ai përmendi edhe gjenocidin e bërë nga serbët mbi shqiptarët e pafajshëm.
“Serbia nuk i kurseu civilët sepse Serbia e donte Kosovës pa shqiptar, të spastruar etnikisht, prandaj lufta e saj ishte gjenocidale sepse ajo vrau fëmijë gra e pleq, gjaku I këtyre të pafajshmëve kurrë nuk do të falet e harrohet nga ne, por do ta kujtojmë Serbinë si kriminale dhe gjenocidale, e cila ende nuk është penduar dhe nuk e ka ndryshuar orientimin dhe kursin e saj politik,” tha Konjufca.
Për dallim prej presidentes Vjosa Osmani dhe kryeministrit Albin Kurti, kryeparlamentari Glauk Konjufca ka përshëndetur edhe Sami Lushtakun i cili ishte prezent në sallën e Kuvendit.
“E nderuar presidente e Republikës së Kosovës, zonja Vjosa Osmani Sadriu, i nderuar kryeministër Kurti, e nderuara familje e heroit tonë Ilaz Kodra, të nderuar deputetë, zëvendëskryeministra e ministra të kabinetit qeveritar, të nderuar përfaqësues të shoqatave të dalura nga lufta e UÇK-së, i nderuar kryetar i Skënderajt, z.Fadil Nura, i nderuari komandant i Zonës Operative të Drenicës, gjeneral Lushtaku”, ka thënë Konjufca në fillim të fjalës së tij.