Klubi futbollistik Llapi ka konfirmuar transferimin e Ardi Qorrit, i cili ishte pjesë e Feronikelit për, gjithsej, 12 vjet.
Klubi nga Podujeva ka bërë të ditur se, ish-mesfushori i Feronikelit do të jetë pjesë e tyre për pesë edicionet e ardhshme.
“Mesfushori Ardi Qorri, pjesë e Feronikelit për 12 vite, ka bërë hapin e radhës në karrierë, duke firmosur kontratë profesionale me skuadrën tonë për 5 vitet e ardhshme”, shkruhet në njoftimin e Llapit.
Tutje, shkruhet se Qorri ishte paraqitur në 34 ndeshje për Feronikelin, duke arritur të realizojë 6 gola e 1 asistim, dhe e veçanta e golave të tij ishin golat nga largësia.
“Ardi u nda i kënaqur me kushtet e ofruara nga klubi dhe pasi firmosi kontratën, do t’i bashkohet grupit të lojtarëve në përgatitjet për garat evropiane që do t’i zhvillojmë në Strugë”, përfundon njoftimi i skuadrës llapjane.
