Sipas mediumit zviceran “Schweizheute”, 35-vjeçari nuk pritet ta rinovojë marrëveshjen aktuale, e cila i përfundon në verën e vitit 2027.

Shaqiri u rikthye te Baseli në verën e vitit 2024 si lojtar i lirë, duke nisur një kapitull të ri te klubi ku kishte bërë hapat e parë të rëndësishëm në karrierë.

Rikthimi i tij rezultoi mjaft i suksesshëm, pasi ish-reprezentuesi i Zvicrës dha kontribut të madh në fitimin e titullit të kampionit dhe Kupës së Zvicrës në edicionin 2024/25.

Edhe këtë sezon, Shaqiri ka vazhduar të jetë pjesë e rëndësishme e skuadrës. Në 14 paraqitje në të gjitha garat, ai ka regjistruar tri gola dhe një asistim.

Megjithatë, raportimet e fundit nga Zvicra kanë ngritur pikëpyetje për të ardhmen e tij, ndërsa mbetet të shihet nëse palët do të arrijnë një marrëveshje të re apo Shaqiri do të largohet nga Baseli pas përfundimit të kontratës.

Për momentin, nuk ka një konfirmim zyrtar nga klubi apo futbollisti për një vendim përfundimtar.