Ministrja e Arsimit, Shkencës, Teknologjisë dhe Inovacionit, Arbërie Nagavci, lidhur me mbledhjen e sotme të grupit punues të projektligjit për tekste shkollore, ka thënë se janë diskutuar komentet e pranuara deri në këtë fazë të shqyrtimit.
Nagavci ka thënë se ky projektligj paraqet legjislacionin thelbësor për sigurimin e cilësisë në arsim në Kosovë dhe, sipas saj, është shumë i rëndësishëm sa i përket arritjes së synimeve për sigurimin e teksteve cilësore për fëmijët tanë.
Ajo ka thënë se aprovimi i këtij projektligji është me interes të veçantë për zhvillimin e sektorit të arsimit parauniversitar në vend dhe zbatimin e strategjisë së arsimit 2022 – 2026.
Nagavci ka thënë se risitë në këtë projektligj janë:
-Aplikimi me dorëshkrime drejtpërdrejt nga autorët dhe përkrahjen e tyre të vazhdueshme përmes ngritjes së kapaciteteve;
-Sigurimi i recensentëve kompetentë e llogaridhënës që do t’i nënshtrohen programit të ngritjes së kapaciteteve dhe në fund, procesit të certifikimit;
-Pilotimi i teksteve shkollore gjatë përgatitjes teknike që i paraprinë vendimit për botim;
-Rishikimi i vazhdueshëm të teksteve shkollore, të hapur për komente nga të gjithë akterët relevantë dhe përgjatë gjithë vitit;
-Në linjë me qëllimin tonë strategjik të digjitalizimit në arsim, me këtë projektligj kemi rregulluar edhe mundësitë për ofrimin e teksteve shkollore dhe materialeve mësimore digjitale.
“Falenderoj të gjitha palët për kontributin e dhënë në këtë projektligj dhe ftoj deputetët që të mbështesin dhe miratojnë këtë projektligj i cili është determinues për rritjen e cilësisë së teksteve shkollore”, ka thënë ndër të tjerash Nagavci.
Kujtojmë që në këtë mbledhje ka pasur shumë polemika mes pozitës dhe opozitës, ku kjo e fundit ka akuzuar këtë projektligj, duke thënë se i njëjti është “i vjedhur dhe i kontrabanduar”.
Lexo më shumë: “I vjedhur e i kontrabanduar”, opozita kundërshton mbledhjen e Grupit Punues për Projektligjin e teksteve shkollore
Për t’u informuar më shumë lidhur me këtë temë, mund t’i lexoni lajmet si më poshtë: