Fund i sabotazhës e fitore për kryeqytetin.
Kështu e prezantoi Komuna e Prishtinës vendimin e Organit Shqyrtues të Prokurimit lidhur me padinë e ndërmarrjes “Pastrimi”, një ditë më parë.
Por në njoftimin e OSHP-së, vetëm kjo nuk është thënë, për asnjërën palë.
OSHP ka vendosur se vendimi nuk mbetet në juridiksionin e saj i takon Ministrisë se Administrimit të Pushtetit Lokal, pa dhënë asnjë detaj për mundësinë ose jo të angazhimit të operatorëve privat.
Gjatë të martës, Komuna e Prishtinës nuk është shprehur e gatshme të deklarohet por në rrjete sociale, e ka bërë të qartë angazhimin e gjashtë operatorëve privat.
Për opozitën, vendime të tilla bien ndesh me ligjin.
“Është e çuditshme se si zyrtar të tjerë të komunës, z. Dushi e z. Manaj që vet kanë përfunduar juridikun nuk ia sqarojnë z. Rama vendimin. Kjo përveç se qesharake është edhe e dhimbshme tendenca me të cilën Rama tenton ta manipuloj opinionin. Për angazhimin e operatorëve privat, në formë të prerë e ka deklaruar Supremja. Ekzkluziviteti për grumbullimin e mbeturinave i takon veç “Pastrimi”-t. Rrjedhimisht, kontratat që ka bërë komuna janë të jashtëligjshme. Është brengosëse heshtja e hetuesisë dhe organeve të drejtësisë që e kanë borxh një sqarim se pse qeverisja e LDK po amnistohen nga ndjekja penale”, deklaroi shefi i asamblistëve të VV-së, Gëzim Sveçla
Por, avokat e konsiderojnë vendimin e mangët.
“Vendimi i OSHP-së është brenda korniza ligjore sepse ky problem nuk e ka zanafillën në ligjin për prokurim publik por krysisht e ka në mosrespektim të rregullorres që e ka bërë kuvendi komunal. E vetmja ç’ka mund të themi se i ka munguar këtij vendimi ështe një arsyetim më i plotë dhe më profersional. I mungojnë çështjet bazike siç është arsyetimi i vendimit të panelit”, deklaroi avokati Qëndrim Arifi
Sipas Arifit, janë dy rrugë se si mund të veprohet më tutje.
“Tash janë dy rrugë: e para që është tërësisht e gabuar sipas meje, është padia e “Pastrimit” në Gjykatën Komerciale për shkak të kundërshtimit te aktit administrativ. Vlerësoj që kjo rrugë është e gabuar dhe gjasat janë që Komercialja ta rrëzojë. Rruga e drejtë, “Pastrimi” duhet ta trajtojë prapë çështjen ligjërsisht, ta rishikojë rregulloren. Në rast se gjen shkelje dhe moszbatim të kësaj rregulloreje, konsideron se i është bërë e padrejtë, të iniciojë konflikt civil, ështe procedurë civile që në procedurë kontenstimore do kërkonte përpos respektimin e rregullores edhe kompensimin e dëmit qe pretendon se i është bërë”, përfundon Arifi
Televizioni ka tentuar të marrë edhe një përgjigje nga ndërmarrja “Pastrimi” por kryeshefi, Petrit Reçica siç ka ndodhur në vazhdimësi, edhe sot ka qenë i paqasshëm.
Megjithatë një ditë më parë, deklaroi se do ta zbatojnë vendimin e Supremes dhe çdo hap ligjor për të mbrojtur të drejtat e tyre.