Sindikata e Bashkuar e Arsimit, Shkencës dhe Kulturës (SBAShK) ka thënë se kohëve të fundit po qarkullon një version i ri i kontratës së punës për sektorin e arsimit, për të cilën ka bërë thirrje që të mos nënshkruhet.
Kjo pasi, sipas SBAShK-ut, ky version është kopje e keqe e një versioni të kontratës së punës, shumë më i dëmshëm dhe shumë më i keq sesa kontrata ekzistuese e punës, që e kanë punëtorët arsimorë.
“Ky version, që po qarkullon, bie në kundërshtim edhe me Udhëzimin Administrativ të MASHT-it, nr. 10/2015 për Kontratën e Punës për Mësimdhënës të Arsimit Parauniversitar. Ky version i shpërndarë ka shumë të meta dhe është i dëmshëm për punëtorët e arsimit, ngase cenon të drejtat e fituara e po ashtu nuk specifikon normën javore mësimore prej 20 orë dhe nuk është specifikuar as pjesa e orëve të tjera që janë për përgatitje për mësim dhe për veprimtari të tjera arsimore. Versioni i ri ka edhe të meta të tjera e të cilat jemi të gatshëm t’ua prezantojmë në takim kolegjiumit të Drejtorëve të Arsimit”, thuhet në komunikatën e SBAShK-ut.
SBAShK-u i është drejtuar publikisht punëdhënësve që ta tërheqin nga qarkullimi këtë version të ri të kontratës dhe të mbajnë një takim së bashku për përgatitjen e një versioni të ri të kontratës së punës.
“SBASHK-u i drejtohet publikisht punëdhënësve që ta tërheqin nga qarkullimi këtë version të ri dhe të takohen me SBASHK-un e të bashkëbisedojmë dhe bashkërisht, nëse është nevoja, të përgatitim versionin e ri të kontratës së punës, nëse do të shtojmë edhe ndonjë të drejtë të punëtorëve arsimorë e nëse jo, atëherë ata kanë kontratë pune në kohë të pacaktuar dhe nuk ju duhet diçka më e keqe nga kjo që e kanë”, thuhet tutje në komunikatë.