Gjësendet që erdhën në Kosovë nga Srebrenica e Bosnje Hercegovinës i takojnë babait të Amra Begiqit, i cili ishte vrarë nga serbët 29 vite më parë në masakrën e Srebrenicës.
Ato u ekspozuan të enjten në “Reporting House” në Prishtinë në përkujtim të kësaj masakre, si pjesë e bashkëpunimit që BIRN dhe Prishtina Biennale kanë krijuar me Qendrën e Memorialit të Srebrenicës.
Aty ishte edhe Mensur Bektiq, autor i lules së Srebrencës, me të cilën masakra identifikohet në gjithë botën.
Ai bëri thirrje për tolerancë pavarësisht të kaluarës.
“Nëse vini në Srebrenicë dhe rrini me nënat e Srebrenicës e burrave të vrarë apo gratë e tyre, krejt çka keni me dëshu është ofshamë e pikëllim por asnjëra nuk lypë hakmarrje. Asnjëra nuk thotë, hajde, vrajeni serbët, hajde, hakmerruni. Ata i edukojnë fëmijët me tolerancë, tolerancë të cilën e ka tregu edhe Kosova”, ka thënë Bektiç.
Pos tolerancës, u bë thirrje edhe për të mos harruar asnjëherë të kaluarën.
Këtë mesazh e dha zëvendëskryeministrja e Kosovës Emilja Rexhepi, që i takon komunitetit boshnjak.
“Ne nuk duhet të harrojmë se çka ka ndodhur se nëse e harrojmë se çfarë ka ndodhur një Srebrenicë ku janë vrarë tetë mijë persona që të shuhet një popull atëherë historia mundet me u përsëritë. Është shumë me rëndësi me shënu këtë moment e me kujtu që edhe ne boshnjakët, edhe shqiptarët e Kosovës kemi pas të njëjtin armik që ka tentu të zhdukë një popull”, ka thënë Rexhepi.
Pikërisht në 29-vjetorin e masakrës së Srebrenicës, Kuvendi i Kosovës ka miratuar deklaratën në përkujtim të viktimave.
Po ashtu, Qeveria e Kosovës e ka shpallur 11 korrikun Ditë Përkujtimore të Gjenocidit në Srebrenicë, bazuar në rezolutën e Asamblesë së Përgjithshme të Kombeve të Bashkuara , të miratuar më 23 maj.