I diplomuar para 20 vjetësh në Fakultetin e Mjekësisë, i specializuar, nga kjo fushë në Londër dhe i doktoruar në Shkup, Bujar Osmani është imponuar si doktor i zoti, por edhe si politikan të cilit nuk i bën syri tërr edhe kur është përballë problemeve e sfidave nga më seriozet: Vitet e kaluara në Ministrinë e Shëndetësisë, në Sekretariatin për Çështje Evropiane dhe së fundmi në Ministrinë e Jashtme, mbajnë edhe vulën e tij.
Përtej debateve që të shpeshtën janë të mbarsura nga intolerancat partiake apo edhe ndëretnike, Bujar Osmani po tregohet si një kirurg i suksesshëm në rrafshin politik që nuk është se nuk vuan edhe sot e kësaj dite nga patologjitë e shumta që shoqërojnë vendet në tranzicion. Dhe, janë vlerësimet kryesisht nga jashtë, nga Brukseli e Uashingtoni, por edhe nga fqinjësia ato që e veçojnë kryediplomatin Bujar Osmani si një politikan i cili din të ecë nëpër tehun e shpatës dhe të dalë pa asnjë therrë në këmbë!
Përkundrazi, ata që e njohin të thonë se ishte pikërisht Osmani ai që amortizoi tensionet në linjën Shkup-Athinë (2018) mes kryeministrave të kohës, Zoran Zaev e Aleksis Tsipras, për të firmosur Marrëveshjen historike të Prespës që zhbllokoi procesin e integrimit euro-atlantik të Maqedonisë dhe që me kapacitetin e Zëvendëskryeministrit për integrime ia doli të shënojë përparim serioz në përafrimin e vendit drejt BE-së. Edhe në postin e shefit të diplomacisë, ai po artikulon më së miri përcaktimet strategjike të koalicionit qeverisës për t’u bërë pjesë e shoqërive të përparuara.
Një mik imi nga Londra që është studiues i çështjeve ballkanike, pranverën e këtij viti, më tha se pa fije dyshimi “ministri i juaj i Jashtëm nuk e ka shokun në Evropën Juglindore”, duke më përmendur si me shpërfillje emrat e homologëve të tij nga pesë shtetet e tjera të Ballkanit Perëndimor…
Dhe, qershia mbi tortë, pa dyshim ishte Ministeriali i OSBE-së i organizuar javën që lamë pas në Shkup: Nga Sekretari amerikan i Shtetit Antony Blinken e deri tek kryesuesi i radhës i OSBE-së, ministri i Jashtëm i Maltës, nuk u la pa u veçuar merita e ministrit Osmani për të mbledhur bashkë edhe Perëndimin, edhe Lindjen, por edhe pse i vuri pikat mbi I-në kur është fjala për rolin e Moskës zyrtare jo vetëm në Ukrainë, por edhe në Ballkanin Perëndimor. Vetë ai hodhi poshtë pohimet e Sergej Lavrovit se për gjendjen e krijuar fajet i ka – Perëndimi: “Garant i stabilitetit në Ballkanin Perëndimor janë SHBA dhe Bashkimi Evropian. Është Rusia ajo që po shkakton probleme në vendet e rajonit. Federata Ruse është ajo që me hapa të dukshëm, përmes lojtarëve të saj në rajon, destabilizon vazhdimisht rajonin. U përpoq të destabilizonte Malin e Zi duke tentuar një grusht shteti në momentin e anëtarësimit në NATO, u përpoq të pengonte referendumin tonë më 2018-tën për anëtarësimin në NATO, minon proceset në BeH, në Serbi, ndërsa përmes Serbisë edhe në Kosovë“.
“Edhe në politikë, si në çdo fushë tjetër, është të të jepet mundësia: Mua këtë mundësi ma dha BDI dhe Ali Ahmeti,”- më ka pas thënë vite më parë me një modesti tipike për të protagonisti i këtij shkrimi.
Trimin vraje ama hakun mos ia ha, – thotë populli!/KDP.