Një i burgosur me inicialet V.M. ka vdekur mëngjesin e së hënës në Qendrën e Paraburgimit në Prishtinë.
Sipas raportit të policisë, vdekja ndodhi të hënën dhe mjeku kujdestar ka konstatuar vdekjen e personit, duke shtuar se i njëjti ishte përdorues i substancave narkotike.
“Qendra e Paraburgimit Hajvali, Prishtinë 26.02.2024 – 07:51. Derisa ka qenë në vuajtje të dënimit një mashkull kosovar është gjetur pa shenja jete, vdekjen e personit e ka konstatuar mjeku kujdestar. Raportohet se i njëjti ka qenë përdorues i substancave narkotike, thuhet në njoftimin e policisë.
Trupi i pajetë është dërguar për obduksion në IML me vendim të prokurorit.
Shërbimi Korrektues i Kosovës (SHKK), nëpërmjet një njoftimi, ka bërë të ditur se i burgosuri po trajtohej sipas rekomandimeve të institucioneve shëndetësore publike, e organet kompetente po i zhvillojnë procedurat ligjore.
“Shërbimi Korrektues i Kosovës dhe Departamenti Shëndetësor i Burgjeve njoftojnë se sot rreth orës 07:40 në Qendrën e Paraburgimit në Prishtinë ka ndërruar jetë i burgosuri, V.M. Vdekja është konstatuar nga ekipi i Qendrës Emergjente të Qytetit. I burgosuri ishte duke u trajtuar sipas rekomandimeve të institucioneve shëndetësore publike (IPFK-së)”, thuhet në njoftimin e tyre.
Vdes një i burgosur në Qendrën e Paraburgimit në Prishtinë
Laureta Ulaj – zëdhënëse e Prokurorisë Themelore të Prishtinës ka thënë se “Prokurorja kujdestare nga Departamenti i Krimeve të Rënda me të pranuar informatën nga policia, e njëjta i është përgjigjur vendit të ngjarjes, bashkë me njësitë relevante. Me urdhër të së njëjtës trupi i pajetë do të dërgohet në Institutin e Mjekësisë Ligjore për t’iu nënshtruar obduksionit, derisa rasti është inicuar si hetim mbi vdekje dhe në koordinim me policinë do të zhvillohen hetimet”.