Më 3 gusht 2015, deputetët e Kuvendit të Kosovës votuan në favor të ndryshimit të një amendamenti kushtetues, duke hapur rrugën për krijimin e Gjykatës Speciale.
Vendimi u miratua me 82 vota pro, 5 kundër dhe një abstenim, ç’ka i mundësoi Qeverisë të procedonte më tej me dy projektligje të tjera të lidhura me këtë gjykatë.
Opozita e kundërshtoi me zë të lartë themelimin e Gjykatës Speciale, duke e cilësuar si të padrejtë, selektive dhe si një ndërhyrje në sovranitetin e vendit. Nga ana tjetër, Qeveria dhe shumica parlamentare e pranuan se ndonëse votimi ishte i vështirë dhe i ndjeshëm, ai ishte i domosdoshëm për të adresuar dyshimet që ekzistonin lidhur me krimet e pretenduara të kryera gjatë luftës nga Ushtria Çlirimtare e Kosovës.
Zyra e Prokurorit të Specializuar (ZPS) ka ngritur aktakuza ndaj disa prej ish-figurave më të larta të UÇK-së dhe politikës në Kosovë, përfshirë ish-presidentin Hashim Thaçi, ish-kryetarin e Kuvendit Kadri Veseli, ish-zëdhënësin e UÇK-së Jakup Krasniqi, ish-eprorin Salih Mustafa, si dhe Hysni Gucatin e Nasim Haradinajn nga Organizata e Veteranëve të Luftës.
Po ashtu, aktakuzë është ngritur edhe ndaj ish-pjesëtarit të UÇK-së, Pjetër Shala.
Si Dhomat e Specializuara të Kosovës ashtu dhe Zyra e Prokurorit të Specializuar janë pjesë përbërëse e sistemit të drejtësisë së Kosovës, por funksionojnë në Holandë dhe përbëhen nga staf ndërkombëtar.