Të paktën 131 persona kanë humbur jetën e janë raportuar mbi 500 raste të dyshuara në shpërthimin e Ebolas në Republikën Demokratike të Kongos, ka njoftuar Ministria e Shëndetësisë e këtij vendi të martën, transmeton agjencia AP.
“513 raste të dyshuara dhe 131 të vdekur janë regjistruar në zonat e prekura”, ka thënë ministri i Shëndetësisë, Samuel Roger Kamba. “Hetimet kanë nisur për të përcaktuar nëse këto vdekje janë të lidhura me sëmundjen”.
Organizata Botërore e Shëndetësisë ka shpallur të dielën shpërthimin e Ebolas si emergjencë shëndetësore publike me shqetësim ndërkombëtar.
Autoritetet shëndetësore kanë thënë se shpërthimi aktual, i konfirmuar për herë të parë të premten, është shkaktuar nga virusi Bundibugyo, një variant i rrallë i sëmundjes Ebola për të cilën nuk ka as terapi të miratuar e as vaksina.
Janë regjistruar raste me Ebola edhe në Uganda.