Në muajin e ndërgjegjësimit për personat me sindromën Down, presidentja e Kosovës, Vjosa Osmani është takuar me disa fëmijë, me të cilët ka bashkëbiseduar dhe kanë bërë foto bashkë.
Po ashtu, të martën më 11 tetor është shënuar edhe Dita Ndërkombëtare e Fëmijës Vajzë, ku me këtë rast presidentja e vendit ka thënë, “fëmijëve vajza duhet t’ua krijojmë mundësinë që të mund ta realizojnë potencialin e plotë. Sa më të fuqishme vajzat e sotme, më të fuqishme janë gratë e së nesërmes”.
Osmani ka thënë se të gjithë fëmijët duhet të trajtohen si të barabartë.
Ata janë si ne, të ngjashëm, të ndryshëm, por të barabartë. Për këta fëmijë nuk mjafton e as nuk duhet të jetë vetëm një ditë. Fëmijët me sindromën Down kanë nevojë për përkrahjen tonë çdo ditë. Çdo ditë e tyre është ditë e jona, e çdo ditë e jona vë në qendër të vëmendjes kujdesin ndaj tyre”, ka thënë Osmani.
Tetori u caktua për herë të parë si muaji i ndërgjegjësimit për sindromën Down në vitet 1980 dhe që atëherë njihet çdo tetor. Është muaj që ka për qëllim t’i ndërgjegjësojë të tjerët për aftësitë dhe arritjet e tyre.