Të premten e 4 nëntorit bëhen 2 vjet qëkur ish-zëdhënësi i Ushtrisë Çlirimtare të Kosovës, Jakup Krasniqi ndodhet në paraburgim në Gjykatën e Hagës.
Këtë e ka bërë të ditur vajza e Krasniqit përmes një postimi në Facebook, e cila i ka dedikuar një shkrim emocional.
Ajo ka thënë se Krasniqi ia ka dhuruar Kosovës shumë vite në burgjet jugosllave e vite tjera luftë kundër okupatorit serb.
“Kujt do ti kishe borxh ti, që i dhurove Kosovës vitet e njëzeta në ilegalitet, vitet e tridhjeta në burgjet jugosllave dhe të dyzetat në luftë kundër okupatorit Serb”.
Ndryshe, sot (e premte) në Dhomat e Specializuara, do të mbahet konferencë për ecurinë e çështjes së ish-krerëve të UÇK-së.
Konferenca do të fillojë nga ora 13:30.
“Prokurori K. Thaçit dhe të tjerëve – konferencë për ecurinë e çështjes 13:30”, thuhet në njoftimin e Dhomave të Specializuara të Kosovës.
Ndryshe, më 29 prill, Zyra e Prokurorit të Specializuar ka dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit.
Prokuroria po pretendon se katër të akuzuarit kanë kryer krime lufte edhe në Gjilan, Budakovë e Semetishtë.
Në aneksin e publikuar sa i përket krimeve që pretendohen se ndodhën në Semetishtë dhe Budakovë, prokuroria ka listuar krimet e luftës si arrestimi dhe ndalimi i paligjshëm ose arbitrar, trajtim mizor ose çnjerëzor, torturë, vrasje.
Ndërkaq, si krime kundër njerëzimit i ka listuar burgimin, vepra të tjera çnjerëzore, torturën, vrasjen, zhdukjen e personave me forcë dhe persekutimin.
Kurse, për krimet që pretendon që ndodhën në Gjilan, si krime lufte i ka listuar arrestimi dhe ndalimin e paligjshëm ose arbitrar, trajtimin mizor ose çnjerëzor, torturën dhe vrasjen. Ndërsa, si krime kundër njerëzimit ka listuar burgimin, vepra të tjera çnjerëzore, torturën, vrasjen dhe persekutimin.
Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë.
Njëjtë është deklaruar edhe Veseli në paraqitjen e tij më 10 nëntor, sikurse edhe Selimi më 11 nëntor.
Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.
Të premten, mbahet konferencë për ecurinë e çështjes ndaj Thaçit dhe të tjerëve