Policia e Kosovës ka njoftuar se të dielën e 18 dhjetorit, në Prishtinë, një person ka raportuar se persona të panjohur kanë shtënë me armë zjarri në drejtim të tij.
Pos dëmeve materiale, nga ky rast nuk ka të lënduar.
Rasti është cilësuar “vrasje në tentativë”.
Sipas raportit 24 orësh të policisë, thuhet se ngjarja ka ndodhur derisa ankuesi ishte duke parkuar veturën e tij.
“Ankuesi, mashkull kosovar, ka njoftuar se gjersa ka qenë duke parkuar veturën e tij, nga një veturë persona të panjohur kanë shtënë me armë zjarri në drejtim të tij. Përpos dëmeve materiale, të lënduar nuk ka”, thuhet në raport.
Sipas njoftimit, në vendin e ngjarjes kanë dalë menjëherë njësitë përkatëse, të cilat kanë gjetur tetë gëzhoja.
“Në vend ngjarje kanë dalë njësitet përkatëse, ku janë gjetur dhe janë konfiskuar 8 gëzhoja. Rasti i dedikohet njësive përkatëse për hetime të mëtutjeshme”, vijon njoftimi.
Ndërkaq, brenda 24 orëve të fundit, policia e Kosovës ka arrestuar 12 persona, ndërsa nëntë persona janë dërguar në mbajtje.