Sekretari amerikan i Shtetit, Antony Blinken dhe sekretari i mbrojtjes i Shteteve të Bashkuara të Amerikës (SHBA), Lloyd Austin, do ta vizitojnë Kievin të dielën, ka njoftuar presidenti i Ukrainës, Volodymyr Zelenskyy.
Vizita e Blinken dhe Austin vjen pas vizitave të disa liderëve evropianë gjatë dy javëve të fundit, për t’u takuar me presidentin ukrainas, Zelenskyy.
Sipas njoftimit të Zelenskyy-t, kjo është hera e parë që zyrtarë amerikanë të nivelit të lartë si Lloyd Austin dhe Antony Blinken vizitojnë Kievin që nga invazioni rus në Ukrainë më 24 shkurt.
Javën e kaluar, sekretarja e shtypit e Shtëpisë së Bardhë, Jen Psaki, tha se nëse një zyrtar i administratës do ta vizitonte Ukrainën, Shtëpia e Bardhë nuk do ta zbulonte publikisht atë informacion para kohe për shkaqe sigurie.
Sipas CNN, kjo vizitë ende nuk është konfirmuar nga Uashington-i.
Austin do të vizitojë Kievin pak para se të udhëtojë në Gjermani javën e ardhshme, për një samit të planifikuar të 40 vendeve të NATO-s dhe aleatëve për të diskutuar mënyrat për të vazhduar armatosjen dhe mbështetjen e Ukrainës.
“Unë dua që ne të kemi armë të rënda dhe të fuqishme,” ka thënë Zelenskyy gjatë një konference për shtyp në një stacion metroje në Kiev të shtunën.
Ai gjithashtu theksoi një qëndrim maksimalist kur bëhej fjalë për mënyrën se si Ukraina planifikon të zhvillojë luftën, duke shtuar se “Pozicioni im si president është: gjithçka që zëmë, ne do t’i marrim të gjitha. Nuk do të jetë çështje tetë vitesh, si nga viti 2014, do të jetë menjëherë. Kjo është një çështje armësh. Nëse kemi mjaft, do të fillojmë menjëherë të rifitojmë territorin e pushtuar”.
Në një mesazh të postuar në llogarinë e tij në Telegram të premten mbrëma, Zelenskyy paralajmëroi se pushtimi rus ishte “vetëm fillimi” i agresionit të Kremlinit, dhe se nëse presidenti Vladimir Putin do të ketë sukses në Ukrainë, Rusia do të “pushtojë edhe vendet e tjera”.
Ky paralajmërim nuk është i pabazë, pasi udhëheqësit ushtarakë rusë kanë sugjeruar se ata synojnë të kapin territorin që do të krijonte një urë tokësore në Transnistria, e cila do të rrezikonte Moldavinë, si joanëtare e NATO-s.
Për momentin, mijëra trupa ruse mbeten të angazhuara në luftime të ashpra në Mariupol, ndërsa trupat dhe civilët ukrainas po bëjnë një qëndrim të fundit në fabrikën e çelikut.
Duke iu lutur vendeve që të “luftojnë përkrah” Ukrainës, Zelenskyy paralajmëroi gjithashtu se vendet që zgjedhin të qëndrojnë neutral në luftë po bëjnë “bastin më të rrezikshëm, sepse do të humbin gjithçka”.
Gjatë dy javëve të fundit, administrata e Biden ka njoftuar se dërgesat e armëve në vlerë prej 1.2 miliardë dollarësh nga SHBA në Ukrainë, kanë arritur në 3.3 miliardë dollarë që nga fillimi i luftës.