Kryeministri i Shqipërisë, Edi Rama, në mbrëmjen e 3 janarit ka zhvilluar një takim me një grup pensionistësh, që kanë dhënë një kontribut të madh në shumë fusha në vend.
Përmes një postimi në Facebook, Rama ka publikuar disa fotografi me ta duke thënë se kontributi i tyre është i pashlyeshëm.
“Një mbrëmje e veçantë me një grup pensionistësh të veçantë, kontribuues të veçantë në jetën kulturore, arsimore e sportive të vendit, ndaj të cilëve borxhi i veçantë do të jetë gjithnjë i pashlyeshëm”, ka shkruar Rama.
Ndryshe, Rama njoftoi pak ditë më parë “Pakon e Madhe” në mbështetje të 1 milion individëve.
Nga këta, 695 mijë pensionistë do të marrin secili nga 70 euro.
“Duke u nisur në radhë të parë, pikërisht nga nevoja për ta larguar atë dorë shqetësuese nga konsumi i tyre bazë, ideuam Pakon e Madhe. Ndërkohë, kjo mbështetje nuk e zëvendëson, as e ndryshon zotimin se pensionistët do të jenë vitin që po vjen, përfituesit e parë nga taksa e jashtëzakonshme mbi eksportuesit e mëdhenj të energjisë, të cilën e miratuam në Kuvend me paketën fiskale 2023. Kështu që kjo pako, ku ka 8000 lekë të reja për çdo pensionist, e cila do të shpërndahet javët e para të janarit, nuk është mbështetja e fundit ekstra për pensionistët për vitin që po troket në derë”, kishte thënë Rama.