Zëvendësdrejtori i Përgjithshëm i Policisë së Kosovës, Fehmi Hoti, me menaxhmentin e lartë të PK-së, kanë pritur në takim Timothy Leeds, drejtor gjeneral i Programit për Asistencë Kundër terrorizmit (Antiterrorism Assistance (ATA) Program) nga Shtetet e Bashkuara të Amerikës me bashkëpunëtorët e tij.
“Gjatë këtij takimi u diskutua bashkëpunimi në mes të PK-së dhe ATA-s si dhe çështje me interes të përbashkët për të dy institucionet”, njofton policia.
Zëvendësdrejtori i Përgjithshëm ka falënderuar ATA-n për përkrahjen e vazhdueshme me projekte madhore për Policinë e Kosovës në ngritjen e kapaciteteve me pajisje profesionale dhe në trajnime.
“Trajnimet dhe pajisjet e ofruara nga ATA, kanë ndihmuar njësitet policore në arritjen e rezultateve pozitive të PK-së, në luftën kundër krimit të organizuar, terrorizmit dhe krimeve kibernetike. Të dy palët u zotuan për avancim të bashkëpunimit të mëtutjeshëm”, thuhet tutje në njoftim.