Lobi serb në Shtetet e Bashkuara të Amerikës (ShBA), sipas veprimtarit shqiptar, Uk Lushi, është tejet i dobët, në krahasim me lobin shqiptar.
Lushi, i cili jeton në ShBA, tha se Serbia është duke investuar për ta fuqizuar përkrahjen e Amerikës për ta.
“Lobi serb po punon, por është i dobët, lobi serb që vjen nga Amerika, amerikanëve me prejardhje serbëve, nuk është as afër potencialit të lobit shqiptar. Serbia ka investuar, paratë po i paguan Serbia. Ka edhe një interes momental që ta afrojë Serbinë, që nuk duhet të shihet si rrezik për Kosovën. Shtetet dëshirojnë pajtim”, tha ai.
Lushi theksoi se në ShBA ka ndërrim gjeneratash, dhe se kongresmenët e rinj nuk e kanë dijeninë institucionale, sikurse ata të vjetrit.
Sipas tij, në të kaluarën lobi shqiptar ka punuar jashtëzakonisht shumë për ta pasur përkrahjen e ShBA-së.
“Ka ndërrim gjeneratash, në dëgjimin që e keni parë, njëri nga kongresmenët e përmend Eliot Engel, por ai nuk është më aty. Të rinjtë nuk e kanë dijeninë institucionale që e kanë pasur ata përpara”, tha ai.
Ai u shpreh se shqiptaro – amerikanët janë të gatshëm t’i shërbejnë interesave të Kosovës në çdo mënyrë.