Sekretari i Përgjithshëm i NATO-s, Jens Stolteberg, pas takimit me presidentin e Serbisë, Aleksandër Vuçiq, ka thënë se sulmet ndaj KFOR-it, të cilat ndodhën në komunat veriore të Kosovës, janë të papranueshëm.
“Ne kemi shtuar praninë tonë si reagim ndaj rritjes së tensionit në veri. Ne do të vazhdojmë të sigurojmë zbatimin e mandatit tonë në mënyrë të paanshme”, tha Stoltenberg.
Stoltenberg tha se Kosova dhe Serbia duhet të përpiqen në ulje të tensioneve, teksa u bëri thirrje të dy shteteve, që ta bëjnë një gjë të tillë dhe t’i mënjanojnë veprimet që do të conin në tensione të reja.
Ai theksoi se pjesëmarrja në dialog, është e vetmja zgjidhje.
“Është e rëndësishme t’i ulim tensionet, dhe për këtë arsye, ne u bëjmë thirrje të dyja palëve që ta bëjnë këtë dhe të përmbahen nga veprimet që do të çonin në përshkallëzim. Ne besojmë se e vetmja mënyrë korrekte është pjesëmarrja aktive në dialogun, në të cilin, BE-ja ndërmjetëson dhe mbështetet nga NATO, Serbia ka qenë prej kohësh partner i besueshëm i NATO-s dhe ne jemi të bindur se do të angazhohet në atë dialog në mënyrë konstruktive”, tha Stoltenberg.