Zëvendësministri i Punëve të Jashtme të Kosovës, Kreshnik Ahmeti, në mbledhjen e së hënës të Qeverisë së Kosovës ka propozuar vendosjen e sanksioneve ndaj grupit paraushtarak rus të quajtur “Wagner”.
Ahmeti ka thënë se ky grup me bazë në Rusi ka trajnuar individë, duke i inkorporuar në zona të luftës dhe duke nxitur dhunë.
“Këshilli i Bashkimit Evropian ka miratuar masa kufizuese kundër grupit ‘Wagner’ me bazë në Rusi. Në këtë grup janë 8 individë dhe 3 subjekte të lidhura më të, pasi, i njëjti, ka trajnuar dhe inkorporuar individë në zonat e luftës në mbarë botën për të nxitur dhunë, plaçkitur burimet natyrore dhe për të frikësuar civil”, ka thënë Ahmeti.
Sanksionet e vendosura nga Republika e Kosovës dhe që u miratuan nga kabineti qeveritar në mbledhjen e sotme, përfshijnë këto masa kufizuesesi si, ngritja e aseteve, ndalimi i udhëtimeve në territorin e Kosovës dhe ndalimin e fondeve.
Sipas Ahmetit, individët e listuar nga BE-ja janë të përfshirë në abuzime serioze në shkelje të të drejtave të njeriut, duke përfshirë tortura dhe ekzekutime.
Ai ka shtuar se vendimi për sanksione është t’i kufizojë aktivitetet e këtij grupi.
Sipas tij, këto sanksione përfshijnë ndalimet e udhëtimit, ngritje të aseteve në Republikën e Kosovës të individëve të sanksionuar dhe ndalimi i vendosjes së fondeve drejtpërdrejt ose tërthorazi të këtij grupi.
Zëvendëskryeministri i Kosovës, Besnik Bislimi, ka thënë se Kosova është rreshtuar ndër vendet e para në vendosjen e sanksioneve ndaj Rusisë.
Kosova edhe më herët ka vendosur sanksione ndaj Rusisë, në vijë me ShBA-në dhe BE-në.
Kryeministri Kurti kishte theksuar se këto sanksione janë ekonomike, tregtare dhe financiare.