Dogana e Kosovës njofton se kanë arritur të mbledhin 1 miliard euro të hyra, duke tejkaluar nivelin e inkasimit krahasuar me periudhën e njëjtë të vitit të kaluar për mbi 70 milionë euro.
“Dogana e Kosovës deri më sot ka arritur të mbledh 1 miliard euro, duke tejkaluar vitin e kaluar me 71 milionë euro apo 7.62%”, thuhet në njoftim.
Siç njofton dogana, edhe viti i kaluar ka pasur trend shumë pozitiv të rritjes dhe njëkohësisht është rritur efekti kundërveprues i thellimit të shkallëve të marrëveshjeve të tregtisë së lirë e në anën tjetër nuk ka ndryshim në politika fiskale, tejkalimi me këtë krahasim dëshmon qartazi vijimësinë e përkushtimit të pashembullt të Doganës së Kosovës në luftimin e ekonomisë joformale dhe promovimin e praktikave që përkrahin konkurrencën fer dhe të ndershme.
“Suksese të theksuara në këto përpjekje janë rezultat edhe i bashkëpunimit me institucionet relevante, komunitetin e biznesit dhe publikun në përgjithësi, andaj ju jemi shumë mirënjohës për përpjekjet e përbashkëta që kanë rezultuar me këto suksese”, thuhet në njoftim, shkruan KP.
