Një zyrtar i Administratës Tatimore të Kosovës (ATK) është arrestuar nën dyshimet për keqpërdorim të pozitës zyrtare.
I dyshuari me inicialet M.K, dyshohet se ka lëshuar dokument të rrejshëm në emër të ATK-së, me qëllim që një biznesi t’i lirohen disa prona të bllokuara.
“Drejtoria për Hetimin e Krimeve Ekonomike dhe Korrupsionit, përkatësisht Sektori për Hetimin e Krimeve Ekonomike (SHKE), ka pranuar informata nën dyshimin e keqpërdorimit të detyrës zyrtare nga një zyrtar i Administratës Tatimore të Kosovës (ATK). Gjatë veprimeve hetimore, në koordinim me Prokurorin e Shtetit, janë siguruar dëshmi se personi i dyshuar me dashje dhe dijeninë e tij, ka vepruar në mënyrë të kundërligjshme duke e keqpërdorur detyrën zyrtare. I dyshuari M. K., viti i lindjes 1969, mashkull/kosovar, kishte lëshuar dokument të rrejshëm në emër të ATK-së, me qëllim që një biznesi të caktuar t’i lirohen pronat e bllokuara”, thuhet në njoftim.
Sipas Policisë, “i dyshuari është intervistuar në prezencën e avokatit mbrojtës dhe me vendim të prokurorit nga PTH Prishtinë i dyshuari dërgohet në mbajtje për 48 orë”.