Rrjeti i njohur social “X”, i cili më parë ishte i njohur si “Twitter”, gjatë të hënës ka ndaluar përkohësisht kërkimin e emrit të yllit të njohur botëror, këngëtares Taylor Swift, raporton “Reuters”.
Kjo ka ndodhur për shkak se me anë të inteligjencës artificiale janë krijuar disa fotografi e video eksplicite duke përdorur figurën e Swiftit, gjë që bëri të reagojnë jo vetëm fansat e saj por edhe Shtëpia e Bardhë.
Pas reagimit të Shtëpisë së Bardhë, e cila imazhet eksplicite i quajti “alarmuese”, drejtuesit e “X” ndaluan tërësisht kërkimin e emrit Taylor Swift derisa u fshinë të gjitha ato përmbajtje.
Tani kërkimi i emrit të saj është riaktivizuar dhe platforma do të vazhdojë të jetë vigjilente në çdo përpjekje për të lansuar këso lloj përmbajtje.
“Do ta heqim menjëherë nëse gjejmë ndonjë”, ka thënë në një deklaratë Joe Benarroch, një nga drejtuesit e “X”.
Që kur drejtimin e “X” e mori miliarderi Elon Musk në vitin 2022, është përballur me kritika për shkak të postimeve kontroverse që bën. E kjo gjë ka bërë shumë përdorues të tërhiqen nga përdorimi i këtij rrjeti social pasi janë frikësuar se po bëhen pjesë e një përmbajtjeje të dëmshme.