Shërbimi emergjent britanik njoftoi se është arrestuar një burrë, pasi së paku tetë njerëz u therën me thikë në veriperëndim të Anglisë të hënën.
Shërbimi emergjent tha se u ka dhënë ndihmë mjekësore tetë pacientëve të plagosur me thikë, të cilët u dërguan në tri spitale të ndryshme, përfshirë në Spitalin e Fëmijëve “Alder Hey”.
Policia në Merzisajd tha se oficerët e armatosur e kanë arrestuar një burrë dhe e kanë konfiskuar një thikë, pas raportimit të një incidenti me thikë pak para mesditës.
Nuk ka rrezik për publikun e gjerë, tha policia.
Kryeminisitri i Britanisë së Madhe, Keir Starmer, shkroi në rrjetin social X se ndihet i tronditur nga ky incident.
“Lajm i tmerrshëm dhe thellësisht tronditës nga Southport. Dua t’i falënderoj policinë dhe shërbimin emergjent për reagimin e shpejtë”, tha ai.
Spitali i Fëmijëve “Alder Hey” tha se ka shpallur incident të madh dhe se departamenti i emergjencës së saj është tejet i zënë.
Ai u kërkoi prindërve t’i sjellin fëmijët e tyre në emergjencë vetëm në raste urgjente./REL