Aktori dhe regjisori fitues i çmimit “Oscar”, Robert Redford, ka ndërruar jetë në moshën 89-vjeçare.
Lajmin e ka konfirmuar përfaqësuesja e tij, Cindi Berger, kryetare dhe drejtuese ekzekutive e agjencisë “Rogers and Cowan PMK”.
“Robert Redford vdiq më 16 shtator 2025, në shtëpinë e tij në Sundance, në malet e Utahs, i rrethuar nga njerëzit që e donin. Ai do të na mungojë shumë. Familja kërkon privatësi”, ka thënë Berger në një deklaratë për CNN.
Redford u bë i famshëm me rolet kryesore në filmat klasikë “Butch Cassidy and the Sundance Kid” dhe “All the President’s Men”. Si regjisor, fitoi vlerësime të mëdha me filmat “Ordinary People” dhe “A River Runs Through It”.
Në vitin 1981, ai themeloi Sundance Institute, organizatë jofitimprurëse që mbështet filmin dhe teatrin e pavarur, e cila sot njihet në mbarë botën për Festivalin e Filmit “Sundance”.
Përveç artit, Redford ishte i njohur edhe si një ambientalist i përkushtuar.