Një operacion i gjerë i Policisë së Kosovës ka rezultuar me sekuestrimin e mbi 500 kilogramëve bimë narkotike të llojit marihuanë në një fshat të Suharekës.
Sipas njoftimit zyrtar, lënda narkotike është gjetur në një stallë ku ndodhej në procesin e tharjes.
Në aksionin e së martës, Policia ka gjetur gjithsej 512 kilogramë e 89 gramë marihuanë, me një vlerë të përafërt tregu prej 750 mijë eurosh.
“Hetuesit policorë nga Drejtoria për Hetimin e Trafikimit me Narkotik-Njësia Prizren, kanë trajtuar në aspektin policor një informacion. Në realizim të veprimeve operativo-hetimore në teren, është arritur që të lokalizohet një vend ku dyshohej se kultivoheshin bimë narkotike.
Kështu, dje me 16.09.2025, në një fshat të Suharekës, në një objekt (stallë), janë gjetur lëndë që dyshohet të jetë narkotike të llojit marihuanë në proces të tharjes (terjes).
Në vendin e ngjarjes është ftuar edhe prokurori, kurse pos lëndës narkotike është gjetur edhe një granata-hedhës (mortajë dore) dhe një pushkë gjuetie.
Pas peshimit të lëndëve narkotike ka rezultuar se pesha totale ishte 512 kg e 89 gr, vlerësohet se vlera e tregut është rreth 750 mijë euro. Në vend-ngjarje janë gjetur dhe konfiskuar dëshmi relevante me rastin.
Lidhur me rastin një person i dyshuar, i njohur për policinë ndodhet në arrati|”, thuhet në njoftim.