Përparim Rama, kryetari aktual i Prishtinës dhe kandidat i LDK-së për një mandat të ri, ka deklaruar me bindje se do ta mposht Hajrulla Çekun e VV-së dhe kandidatët e tjerë në zgjedhjet për kryetar.
Ai ka kritikuar qeverinë për, siç tha, “bllokada puro politike” dhe veprime që sipas tij shkojnë kundër interesave të kryeqytetit.
“E kemi një qeveri të tanë që punon kundër kryeqytetit në anën tjetër shitet kombëtar që ne e duam vendin”, ka thënë ai.
Ai ka komentuar edhe deklaratën e kryeministrit në detyrë, Albin Kurti, për punësim pas vjeshtës, duke theksuar se plani i tij për Prishtinën do të vazhdojë normalisht pasi beson se do të jetë kryetari edhe për katër vjet të ardhshme.
“Në vjeshtë përveç projekteve që i kemi premtuar para katër vjetëve do të vazhdojmë normal edhe me Prishtinën përtej me projekte tjera madhore që tash i kemi në program për katër vitet e ardhshme”, ka deklaruar Rama.