Kryetari i Lëvizjes Vetëvendosje, njëherit kryeministri në detyrë, Albin Kurti, ka deklaruar se partia e tij ende nuk ka marrë ftesë nga presidentja Vjosa Osmani për konsultimet e radhës lidhur me formimin e qeverisë së re.
Kurti u shpreh pesimist për mundësinë e krijimit të një qeverie të re, duke theksuar se vendimi për mandatarin mbetet në diskrecionin e presidentes. Ai shtoi se, në bazë të zhvillimeve të fundit, vendin e presin dy procese zgjedhore deri në pranverë – balotazhi lokal dhe zgjedhjet e reja parlamentare.
“Ne nuk kemi marrë ende ftesë nga zonja Presidente. E dimë që, për herën e dytë, çështja e mandatarit është në diskrecionin e saj. Nga ajo që dëgjuam dje dhe nga rrethanat aktuale, duket se të gjithë po përgatiten jo vetëm për balotazhin, por edhe për zgjedhjet e reja parlamentare”, tha Kurti.
Ai paralajmëroi se Kosova mund të përballet me dy palë zgjedhje brenda pak muajsh, përfshirë ato të pranverës që lidhen me zgjedhjen e Presidentit.
“Mbase është për të ardhur keq që do të mund të kemi, përveç balotazhit, edhe dy herë zgjedhje – në dimër dhe në pranverë. Sepse, kur nuk arritëm t’i sigurojmë 61 deputetë për qeverinë e re, është vështirë të besohet se do t’i kemi 81 për zgjedhjen e Presidentit në pranverën e ardhshme,” shtoi Kurti.