Luka Mishetiq, avokati i ish-presidentit Hashim Thaçi, po vazhdon t’i thotë fjalët përfundimtare në gjyqin e madh në rastin ‘Thaçi dhe të tjerët’.
Mishetiq ka argumentuar se komunikatat e UÇK-së nuk mund të konsiderohen nxitëse të krimit, pasi në të kundërtën dëshmitarët ndërkombëtarë që kanë dhënë dëshmi në këtë çështje do ta kishin vënë re dhe do ta kishin bërë të ditur për trupin gjykues, njofton Dukagjini.
“Komunikatat e UÇK-së nuk kanë qenë nxitëse të krimit sepse në të kundërtën dëshmitarët ndërkombëtarë që kanë dhënë dëshmi në këtë çështje do ta kishin ditur këtë dhe do e kishin bërë me dije për ju”, u shpreh Mishetiq.
Mbrojtja thekson se Prokuroria ka dështuar të ofrojë prova që tregojnë se komunikatat kanë ndikuar në avancimin e politikës së ndërmarrjes së përbashkët kriminale.
Sipas Mishetiq, Prokuroria duhet të tregojë lidhjen shkak-pasojë që pretendon se komunikatat çuan në kryerjen e krimeve të përshkruara në aktakuzë.
Ai shtoi se Prokuroria mbështetet kryesisht në deklaratat e Rrustem Mustafës – Remit.
“ZPS-ja së pari mbështetet në provat e dhëna nga komandant Remi për të mbështetur pretendimet që komunikatat ishin shumë të rëndësishme për krimet e ngritura në aktakuzë. Siç thuhet nga ZPS-ja, Remi ka kontribuar në mënyrë të drejtpërdrejtë me Shtabin e Përgjithshëm”, tha ai, duke theksuar se përse duhej që Remi të orientohej përmes komunikatave.
Sipas mbrojtjes, Prokuroria përdor këtë argument vetëm sepse nuk disponon prova të drejtpërdrejta që dokumentojnë komunikimet mes Shtabit të Përgjithshëm dhe komandantëve të zonave mbi mesazhet e pretenduara.
Sipas mbrojtjes, ZPS pretendon se Thaçi e drejtonte Drejtorinë Politike që nga qershori i vitit 1998, mirëpo nuk ka paraqitur asnjë provë që ai e ka ushtruar këtë funksion para kësaj periudhe.
“ZPS pretendon që Thaçi drejtonte Drejtorinë Politike nga qershori i vitit 1998. Nuk ka asnjë provë që të ketë ushtruar funksionin e Drejtorit të Drejtorisë Politike përpara kësaj periudhe. Që kontrollonte politikat e UÇK-së asaj kohe dhe që drejtohej prej Thaçit. Nuhi Bytyçi që thuhej se ka qenë Drejtor i Drejtorisë Politike në vitin 1998. Pretendim tjetër që prokuroria as nuk i bëri pyetje dëshmitarit. Vetë dëshmitari gjatë kundërpërgjigjeve tha se Thaçi nuk ka qenë Drejtor i Drejtorisë Politike deri në nëntor të vitit 1998. ZPS nuk e kontestoi dëshminë e tij ku pati mundësinë për të bërë pyetje shtesë”, tha avokati Luka Mishetiq.
Tutje, avokati i Thaçit tha se prokuroria nuk ka sjellë prova që ai ka qenë figurë udhëheqëse në Lëvizjen Popullore të Kosovës, duke e cilësuar këtë si pretendim të pabazuar.
“ZPS nuk guxonte t’i bënte pyetje Bislim Zyrapit sepse kishte frikë nga përgjigjet që do t’i merrte, kjo nuk është e drejtë për dëshmitarin dhe të akuzuarit. ZPS nuk jep prova që Thaçi ka qenë figurë udhëheqëse në LPK dhe kjo thjesht është e pabazë. ZPS pretendon se Thaçi ka mbikëqyrur shpërndarjen e informacioneve politike që të garantonte të ishin në favor të shtabit të përgjitshëm të UÇK-së”, theksoi Mishetiq, raporton Klankosova.tv.
Gjithashtu, u theksua se nuk ka dëshmi që Thaçi ka hartuar komunikata politike të UÇK-së. Sipas mbrojtjes, ZPS ka cituar vetëm dy prova për të mbështetur këtë pretendim.
“Nuk ka asnjë informacion që Thaçi të ketë mbikëqyrur shpërndarjen e informacioneve të UÇK-së. Se ka pasur përfshirje në përgatitjen e deklaratave politike, asnjë dëshmitar nuk ka dhënë dëshmi për këtë lidhur me faktin që Thaçi të ketë hartuar komunikata politike. Në fakt, ZPS arrin të citojë vetëm dy prova për të mbështetur pretendimin e tyre që Thaçi ka pasur rol në përgatitjen e tyre”, tha ai.
Në përfundim, mbrojtja argumentoi se edhe Rexhep Selimi ka pranuar se nuk ka pasur njohuri se kush i përpilonte komunikatat, duke e cilësuar këtë si dëshmi që rrëzon pretendimet e prokurorisë ndaj Thaçit, raporton Klankosova.tv.
“ZPS nuk jep prova që Thaçi të ketë pasur rol në hartimin e deklaratave politike. Edhe sikur ZPS të arrijë të tregojë një lidhje mes Thaçit dhe komunikatave, ajo nuk arrin të vërtetojë që ato kanë qenë një kontribut i konsiderueshëm në lidhje me krimet. ZPS pretendon që Thaçi i shikonte oponentët si kërcënim dhe i paralajmëronte se do të ndëshkoheshin. Është e paqartë për ne si kjo pjesë mbështet pretendimin që Thaçi ka kërcënuar oponentët dhe nuk ka asnjë argument që lidhet me këtë pikë”.
“Rexhep Selimi i ka thënë ZPS-së se nuk ka pasur dijeni personalisht se kush i hartonte komunikatat e UÇK-së dhe thjesht ka hamendësuar, Thaçi nuk ka pasur asnjë mundësi të kontestojë dëshminë e Selimit”, theksoi avokati Mishetiq.