Paneli i Gjykatës Supreme në Dhomat e Specializuara në Hagë ka rrëzuar në tërësi kërkesën e Pjetër Shalës për mbrojtje të ligjshmërisë, ka njoftuar Zyra e Prokurorit të Specializuar (ZPS).
Në kërkesë, Shala kishte pretenduar disa shkelje në Aktgjykimin e Apelit të shpallur në korrik 2025.
Sipas njoftimit, “Paneli rrëzoi të gjitha pikat e paraqitura nga mbrojtja dhe konstatoi se nuk ishte shkelur e drejta për gjykim të drejtë e Shalës, ligji penal ose procedurat dhe i deklaroi të papranueshme disa prej pikave”.
Pjetër Shala, ish-pjesëtar i Ushtrisë Çlirimtare të Kosovës (UÇK), ishte dënuar më 2024 me 18 vjet burgim për krime lufte.
Ai u shpall fajtor për ndalim arbitrar dhe torturë ndaj të paktën 18 personave, si dhe për vrasje të paligjshme të një personi më ose rreth datës 5 qershor 1999, në fabrikën e metalit në Kukës, Shqipëri.
Prokuroria kishte kërkuar dënim prej 28 vjetësh për Shalën.
Pjetër Shala, i njohur me nofkën “Ujku”, ishte deklaruar i pafajshëm për të gjitha akuzat.