Inspektorati Qendror i Mbikëqyrjes së Tregut (IQMT), ka sekuestruar një numër produktesh në treg, të cilat janë vlerësuar si potencialisht të rrezikshme për shëndetin dhe sigurinë e konsumatorëve.
Sipas njoftimit, aksioni është realizuar në kuadër të intensifikimit të kontrolleve për mbikëqyrjen e tregut, me qëllim garantimin e sigurisë së produkteve dhe mbrojtjen e konsumatorëve.
Fokusi i inspektimeve ka qenë te pajisjet e makinerisë, pajisjet personale mbrojtëse, lodrat për fëmijë dhe produkte të tjera që mund të paraqesin rrezik gjatë përdorimit.
IQMT bën të ditur se sekuestrimi është bërë për shkak të mungesës së dokumentacionit teknik përkatës dhe tejkalimit të afatit të përdorimit të disa produkteve.
Në total janë sekuestruar, 13 makina shpimi (trapanë), 5 gërryese këndore, 426 disqe për prerjen e hekurit dhe betonit, 251 jelekë sinjalizues, 114 helmeta mbrojtëse, 176 maska saldimi, 11 lloje ngjyrash dhe 931 lodra për fëmijë.