Komisioni Qendror i Zgjedhjeve (KQZ) ka mbajtur mbledhjen e 61-të këtë vit, ku janë miratuar disa vendime që lidhen me organizimin e procesit zgjedhor të 7 qershorit 2026.
Në këtë mbledhje, KQZ miratoi procedurën standarde të veprimit për aktivitetet në Qendrën e Numërimit dhe Rezultateve (QNR), e cila përcakton organizimin, funksionimin dhe përgjegjësitë gjatë administrimit të materialeve zgjedhore, numërimit, verifikimit dhe publikimit të rezultateve.
Po ashtu, u vendos që votuesve të regjistruar në përfaqësitë diplomatike jashtë Kosovës t’u lejohet votimi edhe me dokumente identifikimi të skaduara të Republikës së Kosovës, pas rasteve të evidentuara në proceset e mëhershme zgjedhore.
KQZ miratoi gjithashtu planin operacional për ditën e zgjedhjeve, i cili përcakton organizimin e qendrave të votimit, shpërndarjen e materialeve, raportimin e pjesëmarrjes dhe rezultatet preliminare, si dhe koordinimin me institucionet e sigurisë dhe ato teknike.
Në fund, u miratua edhe plani i konferencave për media për ditën e zgjedhjeve në përfaqësitë diplomatike më 6 qershor dhe në Kosovë më 7 qershor 2026.