Ministri në detyrë i Bujqësisë, Pylltarisë dhe Zhvillimit Rural, Armend Muja, ka njoftuar miratimin e dy vendimeve që synojnë rregullimin dhe rritjen e transparencës në sektorin e qumështit në Kosovë.
Sipas Mujës, përmes Platformës Kombëtare të Qumështit, ministria do të publikojë rregullisht Çmimin Referent të Qumështit, i cili do të bazohet në të dhëna për prodhimin, kostot, importin, përpunimin, çmimet dhe zhvillimet në treg. Ai tha se ky mekanizëm do të shërbejë si instrument orientues për të gjithë akterët e sektorit.
Po ashtu, ministria ka vendosur që marrëdhëniet në zinxhirin e qumështit, nga ferma deri te konsumatori, të rregullohen përmes kontratave të detyrueshme me shkrim. Këto kontrata do të përfshijnë rregulla të qarta për çmimin, cilësinë e produktit dhe afatet e pagesës, të cilat nuk do të mund të tejkalojnë 30 ditë.
Sipas ministrit, me këto ndryshime fermerët do të kenë më shumë siguri për vlerën e qumështit që prodhojnë, kushtet e shitjes dhe kohën e pagesës.
Muja e ka cilësuar këtë si një hap të rëndësishëm drejt krijimit të një tregu më të drejtë, më transparent dhe më të balancuar për prodhuesit vendorë, duke shtuar se Kosova ka nevojë për më shumë prodhim vendor të qumështit, më shumë siguri ushqimore dhe mbështetje më të madhe për fermerët.