Deputeti i Lëvizjes Vetëvendosje, Dimal Basha, ka deklaruar se insistimi i partive opozitare për zgjedhjen e kryetarit të Kuvendit, ndërkohë që paralajmërojnë se nuk do të marrin pjesë në procesin e zgjedhjes së presidentit, tregon sipas tij një përpjekje për ta çuar vendin drejt zgjedhjeve të reja.
Basha, para gazetarëve, u shpreh se qëndrimi i LVV-së mbetet që subjektet politike të ulen dhe të arrijnë një marrëveshje gjithëpërfshirëse për funksionalizimin e institucioneve, duke përfshirë zgjedhjen e kryetarit të Kuvendit, kryeministrit dhe presidentit, njofton Dukagjini.
“Insistimi i tyre për zgjedhjen e kryetarit të Kuvendit do të përfshinte edhe zgjedhjen e kryeministrit, por edhe të presidentit. Nëse insistohet kaq shumë për kryetarin e Kuvendit, ndërsa deklarohet hapur se nuk do të qëndrojnë për presidentin, kjo tregon se po duan të na çojnë në zgjedhje”, tha Basha.
Ai theksoi se kryeministri në detyrë, Albin Kurti, ka bërë vazhdimisht ftesa për diskutime me subjektet politike me qëllim arritjen e një marrëveshjeje për të gjitha institucionet kryesore.
Sipas Bashës, insistimi për zgjedhjen e kryeparlamentarit pa një marrëveshje më të gjerë politike bie në kundërshtim me kërkesat që vetë opozita kishte bërë më herët.
“Ne po e thërrasim të kundërtën: ejani të merremi vesh për të gjitha. Ky është qëndrimi i Lëvizjes Vetëvendosje dhe i kryeministrit Kurti. Mendoj se është qëndrimi më parimor dhe në përputhje me atë që vetë opozita ka kërkuar vazhdimisht, që ose të merremi vesh për të gjitha, ose për asgjë”, deklaroi ai.