Shefi i Grupit Parlamentar të AAK-së, Besnik Tahiri, e ka kritikuar Bashkimin
Evropian, për mosheqjen e vizave për shtetasit kosovarë.
Ai në një konferencë për media, ka thënë se Kosova i ka plotësuar të gjitha kushtet që i janë caktuar nga BE-ja.
Tahiri i ka shtruar dy pyetje në drejtim të BE-së.
“Tani si AAK, i shtrojmë dy pyetje për BE-në: A është kjo një politikë sanksionuese që po i bëhet Kosovës, apo Kosova realisht është peng i politikës së brendshme të Unionit Evropian”, ka thënë Tahiri.
Ai ka kritikuar edhe Qeverinë e Kosovës, që sipas tij nuk ka reagim të mjaftueshëm ndaj asaj që e ka cilësuar si padrejtësi, për shkak të mosliberalizimit të vizave.
“Shohim një mosreagim nga qeveria, mungesa e reagimit, e kundërshtimit e argumenteve në raport me injorimin që i bëhet kësaj teme është e çuditshme, sa ishin në opozitë sa herë sulmonin, tash në pozitë nuk kanë reagim”, ka thënë ai.
Tahiri, i ka përmendur edhe sanksionet e Kosovës ndaj Rusisë, sipas tij, Kosova i ka marrë të gjitha masat e kërkuara nga BE-ja, dhe sipas tij është e padrejtë që nuk është shpërblyer për një gjë të tillë.