Deputeti nga radhët e Lëvizjes Vetëvendosje, Haki Abazi, deklaroi se Asociacioni i komunave me shumicë serbe, nëse themelohet, duhet të ketë funksion të një organizate joqeveritare.
Ai në Kuvendin e Kosovës tha se çështja e Asociacionit është kurth që ka ardhur nga e kaluara.
“Duhet të dekonstruktohet kjo punë se është bërë kurth i madh kjo puna e Asociacionit. Është bërë kurth nga e kaluara, por edhe nga tendenca e projeksionit të frikës mbi atë se çfarë mund të ndodhë me këtë Asociacion”, ka thënë ai.
Deputeti i LVV-së ka thënë se është në interes të Serbisë që të vazhdojë status-quoja.
“Ne duhet patjetër të dalim nga ky kurth, sepse është interes i Serbisë që ta mbajë këtë status-quo. Kemi me mijëra organizata joqeveritare që kanë mision e vizion, nuk do të thotë asgjë që të krijohet një organizatë e llojit të tillë, e cila mund ta përkufizojë të drejtën e komunave për ta përfaqësuar veten në forma të ndryshme”, tha ai.
Abazi ka thënë se marrëveshja përfundimtare duhet të ndodhë gjatë vitit 2023.