Kryetari i Lidhjes Demokratike të Kosovës(LDK), ka thënë se të hënën e 13 qershorit, bëhen 100 ditë nga propozimi i parë për reduktim të akcizës në derivate dhe reduktim të TVSH-së në produkte esenciale.
Sipas tij, ky propozim është refuzuar e po vazhdon të refuzohet nga pushteti arrogant i Kurtit.
Ai përmes një postimi në Facebook, ka thënë se çmimi i naftës në mëngjesin e së hënës, po shënon rekord të ri prej 1.90 eurove për litër.
“Çmimi i naftës këtë mëngjes shënon rekord të ri prej 1.90 eurove për litër; derisa inflacioni i gjithëmbarshëm ka arritur në plot 13%. Në këtë krizë të paprecedentë, mosveprimi është krim”, ka shkruar Abdixhiku në Facebook.
Ai ka bërë të ditur se sot do të dorëzohet në Kuvend, kërkesa për debat parlamentar dhe rezoluta me kërkesë të njëjtë si 100 ditë më parë.
“Po të vepronim me kohë, papërballueshmëria jonë do të ishte më e lehtë, po s’vepruam sot, do të bëhet edhe më e thellë”, ka shtuar më tutje Abdixhiku.
Për rritjen e çmimit të naftës, Ministria e Tregtisë dhe Industrisë pritet t’i përgjigjet me një vendim për caktimin e marzhës së fitimit, ku për shitësit me pakicë, fitimi në litër do të jetë 6 deri në 10 cent, ndërsa të atyre me shumicë, 2 deri në 3 cent.
E kjo nuk i kishte pëlqyer aspak Shoqatës së Naftëtarëve të Kosovës, të cilët kishin mbajtur një mbledhje urgjente.
Kryetari i kësaj shoqate, Fadil Berjanit, një propozim të tillë e kishte vlerësuar si të papranueshëm.
”Kërkesat tona si shoqatë janë vazhdimi i ekonomisë së tregut të lirë, njëjtë si 22 vitet paraprake në pajtim me Kushtetutën e Kosovës, dhe caktimi i marzhave të jetë i bazuar në nivelet e çmimeve aktuale, në të cilat shitja me shumicë të bëhet për 3 për qind, ndërsa ajo me pakicë 12 për qind”, kishte theksuar Berjani.
Madje, ata kanë kërkuar nga Qeveria që të ulë akcizën apo edhe Tatimin në vlerën e shtuar.